பெரியாழ்வார் திருமொழி 1 - 2 - 7

பெரியாழ்வார் திருமொழி - முதற்பத்து
இரண்டாம் திருமொழி - சீதக்கடல்
பாடல் 7

இருங்கைமதகளிறு ஈர்க்கின்றவனை*
பருங்கிப் பறித்துக் கொண்டு ஓடுபரமன்தன்*
நெருங்குபவளமும் நேர்நாணும் முத்தும்*
மருங்கும் இருந்தவா காணீரே வாணுதலீர்! வந்துகாணீரே.

பொருள்:

இருங்கை மத களிறு ஈர்க்கின்றவனை - நீண்ட, கரிய துதிக்கையையுடைய மதங்கொண்ட யானையையும், அதைக் கட்டுபடுத்தி செலுத்தும் பாகனையும் (இரு - கரிய; கை - யானையின் தும்பிக்கை; களிறு - யானை, ஆண்யானை; ஈர்க்கின்றவனை - இழுப்பவனை, கட்டுப்படுத்துபவனை)

பருங்கிப் பறித்துக் கொண்டு ஓடுபரமன்தன் - பருங்கிப் பறித்துக் கொண்டு ஓடும் பரமன்தன் - அவர்களைக் கொன்று யானையின் தந்தங்களைப் பறித்துக் கொண்டு ஓடிய பரம்பொருளின் (பருங்கி - கொன்று ~ பருங்குதல் - கொல்லுதல்; )

கதைச்சுருக்கம்:

கம்சன், கோகுலத்திலிருந்த கண்ணனை தந்திரமாக மதுரா நகருக்கு, கம்சனின் தனுர் யாகத்தில் கலந்துகொள்ளுமாறு அழைத்து, கண்ணனை மதுரையிலேயேக் கொன்றுவிட எண்ணினான்.

கண்ணனும் ஆயர்பாடி மக்களை ஆற்றுபடுத்திவிட்டு, வடமதுரை மாநகருக்கு வந்தான். அங்கே, கம்சனின் அரண்மனைக்குள் நுழைந்ததும் அங்கிருந்த, குவலயாபீடம் என்னும் பட்டத்து யானையினை வம்புக்கிழுத்து, அதை சினங்கொள்ளச் செய்து, யானையையும், யானைப் பாகனையும் கொன்றுவிட்டு, யானையின் தந்தங்களைப் பறித்துக் கொண்டு கம்சனை நோக்கி விரைந்தோடினான்.

அதன் பிறகு, சாணூரன், முஷ்டிகன் ஆகிய இரண்டு மல்லர்களையும் கொன்றுவிட்டு, கம்சனையும் வதம் செய்துவிட்டு தன் பெற்றோர்களை சிறைமீட்டான் கண்ணன்.

நெருங்குபவளமும் நேர்நாணும் முத்தும் - பவளமும் முத்தும் நெருக்கமாய் கோர்க்கப்பட்ட நீண்ட அழகிய அரைஞான் கயிறும் (நேர் நாண் - அரைஞான்கயிறு)

மருங்கும் இருந்தவா காணீரே வாணுதலீர்! வந்து காணீரே - முத்தும் பவளமும் நெருக்கமாய்க் கோர்க்கப்பட்ட அழகிய அரைஞான் கயிறும், இப்பிள்ளையின் இடையில் இருக்கின்ற அழகினை வந்து பாருங்கள்! பவளமும், முத்தும், பொன் மருங்கும் ஒருங்கு இருக்கும் அழகினையும், அவற்றில் எது சிறப்பாய் பொலிகிறதென்பதனையும் வந்து பாருங்கள். ஒளி பொருந்திய நெற்றியினையுடைய பெண்களே இந்த பரமனின் பவளக்கொடி அணிந்த இடையினை வந்து பாருங்கள்! (மருங்கு - இடை; வாணுதல் - ஒளிபொருந்திய நெற்றியையுடைய பெண்கள்)

பதவுரை:

நீண்ட, கரிய, பெரிய மதங்கொண்ட குவலயாபீடம் என்னும் கம்சனின் பட்டத்து யானையையும், யானைப் பாகனையும் கொன்று, அதன் தந்தங்களைப் பறித்துக் கொண்டு கம்சனை நோக்கி விரைந்தோடிய பரம்பொருளான கண்ணனின், பவளமும் முத்தும் நெருங்கக் கோர்த்த அரைஞாண்கயிறு மின்னுகின்ற அவனின் அழகிய இடையினை வந்து பாருங்கள். ஒளிபொருந்திய நெற்றியினையுடைய பெண்களே, பவளமும் முத்தும் நெருங்கக் கோர்த்து அணிந்திருக்கும் பொன்னிடையில் மின்னுவதனைத்தும் வந்து பாருங்கள்.